Wasiirka Arimaha Dibada Sweden oo Geeriyootay


Wasiirka Arimaha dibada dalkan Sweden haweeneydii ugu aheyd Anna Lindh ayaa saakay aroornimadii waxaa ay ku geeriyootay cisbitaalka Karolinsk Hospital ee magaalada Stockholm ee xarunta dalkan Sweden kadib markii ay u dhimatay dhaawaaciii kasoo gaaray mindidii shalay galab abaarihii afartii iyo barka xilliga Sweden nin caloosha ka geliyey iyadoo ka adeeganeysa dukaan kamid ah dukaamanka ugu caansan ee ku yaala magaalada.

"Aad ayaan ugu xumahay inaan maqlo warkan naxdinta leh in ay Anna Lindh u dhimato dhaawicii soo gaaray shalay" ayuu yiri Göran Person oo ah ra'iisal wasaaraha dalkan Sweden oo ay wejigiisa kamuuqatay naxdin iyo muraal dilaac isagoo saakay shir jaraa'id oo deg deg ah qabtay.
"Anna waxey ka tagtay aabe iyo hooyo, shacab iyo xisibgii Social-demokrat-ka oo u aheyd xidig caalami ah, caalamkana waxaa ka baxay haweeney magac ku leh saaxada siyaasadeed" ayuu misna sii daba dhigay hadalkiisa isagoo aad u tiiraanyeysan kana wel welsan mustaqbalka madow ee soo wajahay taariikhda siyaasadeed ee dalkan.
Waxaana hadaladii sii mar walba kamid ahaa inta uu shirka jaraa'id ku jiray "Anna kama aysan tegin Social demokrat-ka ee waxaa ay ka tagtay dadka reer Sweden oo ay u aheyd furihii xiriirka caalamiga ah ee dalkeena"

Si kastaaba arintu ha ahaatee Anna Lindh oo aheyd wasiirkii arimaha Dibada Sweden waxaa ay kamid aheyd haweenka ugu magac dheer ee taariikhda siyaasada dalkan Sweden,waxaana ay wasiirka arimaha dibada aheyd tan iyo sanadkii 1998-dii markaasoo xisbiga talada dalka hayaaku guuleystay dooroshooyinka dalka dhacay.
Waxaana ay caan ku aheyd cod kornimo iyo iyadoon runta ka gaban caaladana aad ugu olaleyso, gaar ahaan Anna Lindh waxaa ay aad uga soo horjeeday siyaasada arimaha dibada dalka Mareykanka ee ku wajahan guud ahaan bariga dhexe iyo arimaha dalka Ciraaq iyadoo marar badan meel fagaari ah ka sheegtay in Mareykan xagal daacinayo arimaha bariga dhexe.
Isku soowada duuboo Anna Lindh waxaa ay u dhimatay dhaawac halis ah oo ka soogaaray mindidii caloosha shalay galab nin kaga dhiftay taasoo u sii dhaaftay beerka oo waxyeelo xoogan u geysatay dhaqaatiirtana ay wax ka qaban waayeen. Anna Lindh saakay oo khamiis ah markey saacadu aheyd
0:6:29 aroornimo ayey nafta kabaxday waxaana ay noqotay shaqsigii labaad ee kamid ah siyaasiinta dalkan oo goob dadku badan yahay lugu dilo, kal hore ayaa ra'iisal wasaarihii hore dalkan Sweden Olof Palme lugu dilay goob aan ka dheereyn goobka lugu dilay Anna Lindh sanadki 1986-dii, markaasoo nin uu ku dhiftay dhowr xabadood.
Ollalihii doorasha codbixinta ee qaadashada lacagta bahwadaagta midowga Yurub ee lugu waday iney dhacaan maalinta ah ayaan la ogeyn in dib loo dhigay iyo inkale maadama dalka guud ahaan murugo iyo siyaasad madow ku jiro.

Ikraam Cali-kaar
Gothenburg, Sweden
ikraam@journalist.com