Miyaan dooqa keligeey laheyn?

Amran iyadoo ooyeysa ayey qolka kasoo baxday, damiirkeeda ayaa siin waayey iney u adkeysato murankii iyo doodii dheereyd ee dhexmartay iyada iyo walaalkeed.
Waxaaba taas uga daran dhirbaaxadii sidda naxariis la’aanta ah ee dhabankeedii ugu dhacday ee aysan marna filaneyn.
Intaa ugama harine oradkii ay qolka kaga soo baxday ee waxaa u misna uga daba yimid qolkii fadhiga ee ay dooneysay iney kaga nabadgasho qeyladiisa iyo dhirbaaxadiisa oo ay ogeyd hadey misna doodu socoto iney mid kale filaneyso gacan iyo wax ka badanba, sidaas daraadeed lafaheedii bey kala soo carartay ninkaas naxariis laawaha ah, doodiina hadana halkeedii bey ka bilaabatay iyadoo Amran markan diyaar u noqotay in korkeeda waxkasta ku dhacaan fiiloba Allaah ka dhigee.

- Maxaad u soo baxday oo aad ii dhageysan la’dahay?. Marbey gacanteyda kugu dhacday ha igu kalifin inaan markale kuu celiyo ee naa i dhageyso waxaan ku leeyahay!
- Walaal maxaan kaa dhageystaa, ma waxaan dooneyn inaad ii sheegto mise wax kale? Haddaad heyso sheeko kale oo soconeysa ii sheeg, aan ka aheyn arinta wiilka walaalkeey ah ee aad rabtaan inaad igu ja juubtaan, hooyadeey baan ka diiday iney ii guuriso nin aan raali ka aheyn. Markaa ha isku daalin waxaan lagaa yeeleyn ee danahaaga kale raaco!

- Naa waa edeb darantahay ee maxey tahay sababta aad ku diideyso Cabbaas? Sow maahan wiil walaalkaa ah oo aad meel ku soo wada korteen oo aad aqoonta u leedahay?? Xagguu kuu joogaa ninka ka fiican Cabbaas ee ku dhiqi karra, mise weli waxaad ku hamiyeysaa inaad ciyaal suuqiinta gidaarada la istaagto? Koley sheekadaasi meel kale ka socotaayaba halkan lagama yaqaano anshax xumadaas mana maqli karno in la yiraahdo gabadhiinii ayaa nin ciyaal suuq ah jidka la taagneyd. Qoys sharaf leh baa nahay oo waa nala yaqaanaa.

- Oo kaalay aboowe haddaan iri waxaas marabo ma qasabaa? Sanka miyaa la iska gelinayaa. Waxaad sheegataa inaad tahay nin reer magaal ahee, maxey tahay maskaxda dambeysa ee ja juubka ku dheehan aad igula hadleyso?.

Hooyo waaba la gareysan karaa waa dadkii hore oo dhaqankoodii adkaa ee, adiga magaalada ku koray miyaa sidan iila hadlaya? Meeshii aan kaa filayey garab inaad isiiso miyaad la mid noqotay hooyo? Awalba waan ogaa maangaabnimadii aabe kugu sheegi jiray iney hadda soo baxday, misna aad rabto inaad sidan reer dhan ku hogaamiso ”Misbiyaajo! saaxiib tan ku guursato aa kugu dhib qabta Alxamdulilaah inaadan aniga i guursaneyn”.Ee ha is daalin, horaan hadal kuugu dhameeyey mid aan hooyadeey ka diiday inaan kaa yeeleyn waad ogtahay ee orod iga kortag mana xamili karro naac naacdaada aan nuxurka laheyn!

Feer buu iskula baaciyey Maxamuud markey dhagihiisa maqleen ”Tan ku guursata aa dhibkugu qabta”, nasiib xumase taleefankiisa gacanta ayaa soo dhacay oo deg deg uga jawabaay. Amrana sidaaseey kaga nabad gashay galabkaasi dhirbaaxo iyo wax ka daran oo ku soo food lahaa. Markan carabkeedii baaba dheeraday oo Maxamuud bey u dhigatay iney tiraahdo uma qalantid in naagi ku guursato. Iyadaa lugaheedii ku doonatay dil iyo aflgaado waxkastoo ku yimaadaba. Nasiibey beyba leedahay hadey sidiisa kale uga nabad gasho waaba isagooy aflagaado u geysatay.

Maalintaasi waxaa uu ku dhaamaday guul darro iyo niyad jab aad u weyn oo uu Maxamuud kala kulmay walaashiis ee uu islahaa bal si kale wax ugu sheeg in kastoo u qaaday gacan uusan jecleyn inuu ku dhifto gabadha walaashiis ah ee uu sida aadka ah u ixtiraami jiray. Hadana waxaa uu dulqaad u yeelan waayey jawaabihii is difaaca ahaa ee dhexmaray isaga iyo Amran.

”Waad igu jees jeestaye weyse noo taal labadeena ee Illaahow mey hooyo tiraahdo hadalkeygey diiday waxaad iigaga fakatay taleefanka xunka ah ee soo dhacay oo aan ka maarmi waayey inaan ka jawaabo”, ayuu yiri isagoo qolka kasoo baxaya.

”Weligaaba is waal qurun yahow ee i dhaaf!” ayey misna iyadoo qeylineysa tiri, iyadoo hadda xanuunkii dhirbaaxadii galab dheer lugu dhiftay soo kartay wejigana la gaduutay.
Intey istaagtay ayey isku fiirisay muraayad meesha tiilay, mise wejigeedii meeshii looga dhiftay dhirbaaxada ayaa dhibac dhiig ah noqotay. Oohin bey iskula tuurtay kursigii dheeraa ee meesha yiilay, waxaana ayadoo murugeysan ku catowday in haddii aabaheed Xaaji Yuusuf noolahaan lahaa aan sidan loola dhaqmeen, balse nasiib darro Qadarta Alle aan nina dhaafi karin. Ee aabaheed ay waxa dunida guudkeeda saaran ugu jeceleyd waxaa oofsaday Allahii abuuray ee xaggiisa loo noqonayo. Mowjado aan la ogeyn baa ku furmay hadey awoodi laheyd galabkasi iney wax uun sameyso waa ay sameyn laheyd. Nasiib darro waa iyadoo dumar ah oo aan laheyn awood iyo iyadoo walaalaheed balan qaadeen iney dilayaan haddii ayan u dhaqmin sidii gabar u joogto reerhooda laga rabay.

Cambaar markey ku jiiftay kursigii sidii wax daalan ama jiran murugano wejigeedii ka muuqdo ayey iskaga luuday qolkeedii, tabar darro iyo xanaaq haya awgeed ayey la dhaqaajin weysay adimada. Si dirqi ah ayey ku haleeshay sariirteedii meeshey kaga tiilay qolka hoostana kasoo xiratay albaabkii si haddii ay islaanti iyo wiilkii waalnaa ee Maxamuud yimaadaan u soo gelin oo hadana aan markale buuq iyo qeylo u dhicin.

”Aboowow hadaad noolaan laheyd sidee ayey nolosheyda ahaan laheyd maanta. Waxaa la ii diidan yahay wiil ay nafteydu raacday oo soomaali ah, mid aanan rabina waa la igu qasbayaa. Xaq Illaahey miyaa waxaas, miyaaney meesha joogin wax Islaanimo sheegto oo qadariniya qiimaha jaceylka” ayey iyadoo ooyeysa Amran tiri. Rajo xuna ka qabta wiilka ay sheekeystaan ee ay is calmadeen. Waxeyse isweydiisay waxa dhici doona kolka la kala qariyo iyada iyo wiilka jaceylka daran dhexmaray oo ay durba ka muuqato sida aaney uga maarmin maalin qura noloshiisana u dooneyso.

Lasoco cadadka danbe insha Allaah……………….!

Ikraam Cali-kaar
Gothenburg, Sweden
ikraam@journalist.com