Miyaan dooqa keligeey laheyn?

Qeybtii 15aad

Bisinka!! Amran iyadoo careysan bey warkaasi naxdin leh beerka u galisay islaantii hooyadeed aheyd waaba kadarroo dibi dhal!! maanta wey cadeysatay warkeedii waxey sheegtay ineysan dooneyn guurka Cabbaas. Su'aashu waxey tahay islaantu mayeeleysa walaalkeed Maxamuudse meesha waa fadhiyaa oo haddii loo baahdo feerka iyo haraantidada waa gamayaa ee fal noocee ah buu bixin doona hadey ku adkeysato warkey sheegeyso. Allow adaa maanta godkaaga biyo kuugu soo galeen Amraneey!! Ma islaantey ogeyd bey war ku soo celisay? Wixii soo soo gaara iyadaa masuul ka ah. Nin farruuran baa la yiri "Farrurow maxaa Barbera ku geeyey markaasu yiri fadduul!"
Islaanta iyo wiilkeeda waa la iswada eegey, Amranse siddii ruux dhangax ku dhacay bey labada dhinac iska fiirineysa, gacanta meeshey uga imaneyso oo ay hubto iney tahay dhanka Maxamuud ayey indhaheedu jiraan. Meeleysan ka filaneynse bey uga timid.

"Yaa, maxaa tiri iigu soo celi?? xaajiyadii kiiska iska waaleysay baa tiri. Guri joogis ma jirtee warkaaga cadeyso gabaryahay bey misna sii daba dhigtay hadalka iyadoo marna is daarta marna is demisa siddii burkijo dhuxulo ka buuxaan oo hadba dhinac dabeyshu ka babineyso.
- Hooyo waxaan ku iri Cabbaas iyo guur midna ma rabo, ee gurigeenaa joogayaa hadal xun miyaa?. Haddii kale sow guur guur maahan mid baan is rabnaa oo aan heshiinaye igu dara, haddii kale wareerka iga daaya!

Istaasi markey intaas afkeedii kasoo baxday iyadoo awalba yaa marlee afkeeda fura taagneydee taleefankii meesha yiilay bey inta haabatay indhaha kaga tuurtay kuna soo booday iyadoo dhirbaaxo iyo gacan waxey awooday ula tagtay.

Halkii baa bulan iyo qeylo ka dhacday "wuuuw habarta gabadha ka celiyaaay!", gabadhii waxey gashay is difaacid iyo iska qabato gacantii habarta. Xaalku markan waa xumaaday islaantii fursad ay weligeed raadin jirtay baa maanta soo baxday. Siddii ruux boorane qabey bey beb dheh beb dheh ku jirta ceytan iyo habaar aan kala go' laheyna waa wadaa hadeysan nafta ka siibin bey nasiib laheyd. Saciid yare iyo C/salaan oo wiilasheeda kamid ah gurigana joogay baa soo oroday oo nin walbaa iyaga kamid ah habarta iyo gabadhii kala celis ugu dhaqaaqay. Maxamuudkii waalnaa ee fidnadan geetiisa ka hurayey meeshuu fadhiyaa kama celine fiirsasho ayuu ugu dhaqaaqay.

C/salaan waa da'da ku xigta Maxamuudka curudka ah inkastoo fikir ahaan uu islaanta dhankeeda u janjeero hadana saacadan waxuu ka xun yahay dilka habartu dileyso gabadheeda madiga ah kuna qasbeysa waxeysan rabin. dhirbaaxooyinkii loowaday Amran ayuu isku dhigay kana celiyey habartii oo Saciid yare dhinac ka jiidayo.

"I daaya maxaad iiga celineysaa kufaarta aan dilee, anshax xumaa ma anagey na mooday dhoocil faceed ah markey nugu soo afcelineyso, anigaa kibirka kaa badshay oo iri waa gabar weynee suuqaga mar bal car war igu soo celi" Gabadhii oo naxdin awgeed qalali gaartay korkeediina xagtin iyo barar meelaha qaar kamuuqo ayaa wiilashii ula carareen qolkeedi.

Kamaaney harrin intey fandhaal dheer oo ay xalwada ku karsan jirtay kushiinka ka doonatay bey hadana ugu tagtay qolkii lana kortay ushii gabadhii oo fiq fiq ku jirta.

Amran xanuun awgeed bey la ceshen weysay oohintee waxey bilowday iney hogoto oo uun usha korkeeda ku dhacdo jeer fandhaalkiiba dhowr cad u qeybsamay hadana gacan iyo qaniinyo loou daray. Celiskii wiilasha ee isku dayeen iney ka celiyaan wax matarinee duqdaa ka xoog badnaatay ciilkii iyo caradii hayey awgeed bey la dareemi weysay in gabadhu tahay ruux Illaahey naf geliyey oo damqasho leh markey daashay bey iskeed uga tagay.

- "Ma i maqleysaa gabaryahay ku farax ama ka nax, laga bilaabo saacadan albaabka kama bixi kartid iskoolna warkiisna daa adigaa diiday wanaaga hadaan wacayaa iskoolka una sheegaya inaad safar aaday" Sheeko badnaa islaantu iskoolka dowladey mooda iney sidey rabta ka sameysan karto, ma gaaladan shakiga badan bey ka dhaa dhacsiineysaa gabadhii baa safar ku maqan?

Gabadhii yareyd waaga ku baryey ciil iyo xanuun awgiiis baa indhihii la gaduuteen qolkii korka looga xiray bey sariirtii bustaha saarna ee daabkii kaga xigsaneysay hoostiisa kaga jirtaa. Ma taqaan sidey yeesho cirkii baa ku soo dumay. Ineysan iman baa u rooneyd guriga hadey ogtahayse ma timaadaane wanaag iyo dabacsanaan samee ay laheyd bey hada eersaneysaa.

Islaantii oo weli habaarkii iyo qeyladii wada baa ku soo laabatay fadhigii ay ka dhigtay meel fardo ku dur duriyeen sidey hadba sheygii gacanteeda haaban karro u qabsaneysay. Aw Maxamamuudkii bilaa damiirka ahaa isagu talaabo ma dhaqaajin intey islaantu ku maqneyd dagaalka Tv fiirsasho buu iska jiray shidada iyo lurka guriga gees ka jirta maba heyso isaga.

C/salaankii oo gacanta ku dhagan baa islaantii la yimid fadhiga canaan iyo qeylo buu iskugu daray una sheegay in waxey ku kacday aysan aheyn mid xal keeneysa siina kala fogeyneysa iyada iyo gabadheeda.

-"Maandhow warkaaga marabee iga daa hadalka, yaanan adnah kugu darine.?

-Hooyo war deysmo maahe daganaanta kaasho! Teeda kale waa ceeb hooyo gabar qaan gaar ah looma gacan qaado ma taqaan meeshaan joogno waa qurbe hada deriska waa namaqlayeen waxey sameyn doonaan maad ogtahay?

- Waxey doonan ha sameeyaan midaan inaan kow kasiiyo maahee si kale ciilkeed iima deynayo aniga iyo iyadana sidaan maba kuwada joogeyno adduunka teeda ama teyda soconeysa BAASTA ee BUUNDO intey tiri ayey inta wax gocotay ku carartay katabaankii dharka surnaa soona dhifatay jaakadkii dhaxanta ee Amran laheyd ee meesha surnaa kana soo bixisay taleefan gacan oo gabadhu laheyd inta kaarkii ku jiray ka bixisay daaqada ka tuurtay!!
Miskiin Amran!! waa halkaas ku ciirsi iyo is garsiin la'ow!! oo misna waa yuusan Axmed yare soo wicin guriga markuu ku daalo taleefanka gacanta hadduu soo wactamana la yiraahdo ma naqaanAmranee nadaa!!


La soco cadadka, dambe haddii Alla idmo....!!

FG: Xaquuqda sheekadan wey dhowran tahay, lama badali karro lamna qaadan karro ilaa ogolaansho buuxda laga helo qoraha sheekadan!

Ikraam Cali-kaar
Gothenburg, Sweden
ikraam@journalist.com