Gothenburg, Sweden

”Damiirqabayaalkii shalay Daneysteyaalkii maanta!”

Waxaa qortay; Ikraam Cali-kaar

Ma aheyn wax farqi u dhaxeeya shalay iyo maanta markey damiirqabayaalkii Embagthi iyagoo xamaasadeysan ay codkooda kalsoonida u diideen, Ra’iisal wasaaraha siyaasad baradka ah ee ina Geedi, ee waxey aheyd mid markey iska dhax waayeen xildhibaanadaasi magacyadooda iney caroodeen oo ay sheegeen in waxa Geedi ku dhaqaaqay aaney aheyn mid caqliga yeello.
Maanta oo aan muddo sidaasu u dheereyn kasoo wareegtay leyligii adakaa ee Geedi loo diray waxaa la filayey inuu si fiican indhihiisa u furi doono qalinkana u wax badan ku sixi doono.

Hase ahaatee lafilanmeyn inuu ”Qaladkii shalay ku saxo qalad kale”. Si kastaaba ahaate cod bixintii maanta loo qaaday dowlada dibad joogta ah iyo” Sidii xilkasnimada laheyd” ay ku siiyeen cod aqlibiyad buuxda Ra’iisal wasaare Geed waxey aheyd mid calaamad su’aal badan ku heereysan yihiin, jawaabteedana la sugayo iney ka jawaaban xillidhibaanada garaadka yar ee dowlada duur joogta ah.

Dhabta hadaan kuu sheegana sheekadaoodu maba dhaafin ”Af wax cunay xishoo”Hadaba su’aasha mudan in la isweydiiyo”Damiirqabayaalka shalay” Maxey dhaliileen, ma tirada 37-da wasiir baa labadnaatay mise waxey ula ekeyd iney magacyadooda iska dhex waayeen, beelaha qaarna loo buuxshay dambiisha, halka qaar kalena iyagoo harcad tahay la diray sahey la’aan.

Sidoo kale ma waxey ahaayeen wadaniyiin oo waxey ka dhii-dhiyeen qaladaadka iyo danaha shisheeye dowladaasi lugu sheegay iney fulineyso.?? Qaladkii shalay dhacay weli waa halkiisiye maxaa sacab iyo sawaxan loogu ansixiyey oo soomaalinimo aan uurka jirin loogu hadaaqay??

Mudanayaasha Baarlamaankuse ma ahaayeen kuwo u damqanaya dadka Soomaaliyeed ee heeryaddu saaran tahay? Haddiise dowladani wax badan u socdaan xagey dhaqaalo iyo agab ay ku shaqeyso wasaaradda macanleyda ah ka keeneysa? Ma Itoobiya oo iminka garwadeenka u ah ayaa u soo direysa xafiisyo qalabeysan.

Jawaabta tan dambe u baddi maxaa yeelay shalay mudanayaasha wasiiro doonka ah waxey meelkasta ka sheegen in Itoobiya ay tahay mida shirkan iyo madaxdeeda meesha soo saartay. Maantase ay tahay wax layaabl eh iney arki waayeen waxey shalay dhaliilayeen.

Isku soo wada duuboo arrinka baarlamaanka garaadka yar iyo ina Geedi waa mid bilow u siyaasad marrin habowsan oo taariikhda meel ka galeysa.Waqtigan adag waxey aheyd iyadoo qeybo kamid dadka Soomaaliyeed ee ay tacadiyo ka tirsanayeen maamuladdii dalka soomaray in la qanciyo lana raaligareeyo dadka walaalaheen ah eer waqooyi, hase ahaatee dowlada ina Geedi dib u heshiisiin ay sameyso iska daaye waxey sida muuqato ku socotaa mid sii kala dileysa guud ahaan Soomaaliyadii qaranimadeedii shinkeed galay waxna u dhintay danaha dalka.

Hubaal waxaa ah in dowladani oo taageero weyn ka heleysa cadowga soo jireenka ah ay mari doonto halkii tii Carte martay, maxaa yeelay maheyso mab’da iyo soomaalinimo ay ku shaqeyso. Balse waxaa amuun mudneyn tii Cali Khaliif oo ka dhiidhisay iney cadowga soo jireenka ah siiso fursad ay Soomaalida ugu arimoso.

Nasiib darrase dowladaasi lafteeda waxey xaalkeedu ku dhamaaday “Markaan tabar haye tallo maan heyn markaan tallo hayeyna tabar maanheyn”Somaaliyana Ilaahey baa u ah wehel oo towfiiqda waafijin doona ee intii damiir lahow ka dhiidhiya shirqoolada dahsoon ee cadowga gaar ahaaneed!

Ikraam Cali-kaar
Gothenburg, Sweden
ikraam@journalist.com

Fiiro Gaar ah: Aragtida qoraalka waxaa leh qoraaga ku saxiixan, kana tarjumi maayo aragtida Somaliroots.com